L Südtiroler Künstlerbund scrij ora n cunlaurazion cun la Direzion dl‘Intendënza y Cultura ladina per l prim iede l cuncors artistich "Ert X Merit Ladin". L travert de chësc cuncors ie de pudëi sëurandé n’opra d’ert coche pest de recunescimënt per l mpëni de na vita – l Merit Ladin. "Cun chësta scumenciadiva dëssel unì unerà persunaliteies che à cun si gran mpëni purtà pro a renfurzé l’identità ladina, sibe tla scienza, tl’educazion o tl’ert, cun na fazion che luna nce sëura i cunfins dla cumenanza de rujeneda ora", sotrissea l Assessëur Provinziel per l’Istruzion y la Cultura ladina Daniel Alfreider.
“Cun l pest y l cuncors scrit ora te chësc cuntest ne uelen nia mé uneré n mpëni ejempler, ma nce sustenì l lëur artistich y dé n sëni vif dl liam culturel. Ie son recunescënt che l Südtiroler Künstlerbund à sëurantëut chësta scumenciadiva de valor, pra chëla che l vën tëut ite nce d’autra urganisazions d’ert ladines“, auza ora l diretëur dl’Intendënza y Cultura ladina André Comploi.
“L ie n gran unëur y tl medem mumënt n arichimënt che artistes y artisć fej pea pra la realisazion dl Merit Ladin. L liam danter esprescion artistica y recunescimënt culturel ti dà ala uneranza mo n majer pëis y mo plu vijibltà“, spiega Alexander Zoeggeler, presidënt dl Südtiroler Künstlerbund.
L possa fé pea artistes ladines y artisć ladins de prufescion che mostra su n troi artistich y/o na furmazion aldò. L cuncors ie daviert per duta la formes d’ert visuela y ne à degun lims de età.
Chi che ie nteressà possa mandé ite nchin ai 6 de setëmber 2025 al mascimo trëi opres che ie bele. L vën udù de bon uedl opres saurides da tenì tla man, che ie adatedes per unì sëurandates ala persunalità unereda. N cont dl cuntenut ne vëniel scrit dant nia. L’opra dassëssa mustré n omaje lunënt, na vijion o n sëni de recunescimënt, simbolisan l valor y la uneranza dl’opra de vita. N liam cun la cultura ladina vën ënghe udù de bon uedl.
La vela unirà fata da na giuria de persones espertes, cun reprejentantes y reprejentanc dl Museum Ladin (diretëura Katharina Moling), de La Vëta (presidënt Aron Demetz), dl‘EPL – Ert por i Ladins (presidënt Iaco Rigo) y dl Südtiroler Künstlerbund (presidënt Alexander Zoeggeler y vizepresidënta Eva Gratl).
L’opra d’ert crissa ora vën premieda cun n pest de 7000 Euro brutto, finanzieda dal Südtiroler Künstlerbund tres n cuntribut dl’Intendënza y Cultura ladina dla Provinzia autonoma de Bulsan.
La sëurandata dl pest sarà ai 21 de setëmber 2025 n ucajion dla festa per l Merit Ladin tl cheder dl Di dla Cultura Ladina.